ആകാശത്ത്
ദൈവം തനിച്ചാണ് എന്നതിനുള്ള തെളിവുകൾ
അഥവാ
മഴക്കാലത്ത്‌
കുട്ടികൾ മുട്ടിപ്പായി പ്രാർത്ഥിക്കുന്നതിനുള്ള കാരണം

...................................

മേഘങ്ങൾക്കിടയിൽനിന്ന്
വീടിന്റെമുന്നിലെ പേരമരത്തിന്റെ
തുഞ്ചായത്തേക്ക്  ചാരിവച്ചിരുന്ന കോണി
ദൈവംതന്നെ എടുത്തുമാറ്റിക്കാണും,
ശൂന്യതയിൽ നിന്നുള്ള
പഴുത്ത പേരക്കകളുടെ വരവ്
നിന്നുപോയിരിക്കുന്നു...

പുളി,
ചാന്പ,
ലൂബി,
നെല്ലി,
കാര,
ഞാവൽ
ഇത്യാദി  മരങ്ങളുടെയെല്ലാം
തലക്കു മുകളിൽ
കട്ടകുത്തിനിന്നിരുന്ന 
വെളുത്ത മേഘക്കെട്ടുകൾ
ഇപ്പോൾ അവിടില്ല,
അവയിൽനിന്നെല്ലാം  താഴേക്ക്‌
ഒലിച്ചിറങ്ങിയിരുന്ന
കൂറ്റൻ  കോണിപ്പടികളും
മഞ്ഞുപോയിരിക്കുന്നു...

ഇത്ര പെട്ടന്ന്
ദൈവത്തിനു പിണക്കംവരാൻ
കാരണമെന്തായിരിക്കും?

ഇനി ആകാശത്തിന്റെ
മൂലയിലെങ്ങാനും പോയിരുന്ന്
ഞങ്ങളുടെ തലയിലേക്ക്
വട്ടംചുറ്റിച്ച്
മൂത്രമൊഴിക്കാതിരുന്നാൽ മതിയായിരുന്നു!

......................................