Monday, June 20, 2011

തീവണ്ടിയുടെ 
രൂപ സാദൃശ്യങ്ങള്‍....

നാട്ടിന്‍പുറത്തെ 
ഒതുക്കിലും 
കുളവക്കിലും
ചൂളമടിച്ചു കാത്തു നില്‍ക്കാറുള്ള 
കാമുകന്‍ കുമാരേട്ടനോട് 

ഒരൊറ്റപ്പിരിയന്‍ കയറില്‍ 
നീണ്ടു നിവര്‍ന്ന്
മുന്നാക്കം പത്തും
പിന്നാക്കം പത്തും
ബാലന്‍സു തെറ്റിക്കാത്ത
വേലപ്പനാശാനോട് 

ഒട്ടിനില്‍ക്കുന്ന  ഇരുട്ടില്‍ 
മെഴുകുതിരി വെട്ടം തൂവി
ഞങ്ങള്‍ പിള്ളേരെ 
വരിതെറ്റാതെ 
പിന്നില്‍ നടത്തുന്ന  
വല്യേട്ടന്‍ മാപ്പിളയോട്

വംശവേരിലാരോ
എപ്പോഴോ
രണ്ടു പോത്തിനെ 
വളര്‍ത്തിയതിനു 
ഇപ്പോഴും 
പോത്ത് നായരെന്നു 
വിളിപ്പേരുള്ള 
പരമു നായരോട് ...

ഒക്കെ 
എന്നും രാത്രിമൂക്കുമ്പോള്‍ 
പാലം കടന്നു പോകുന്ന
തീവണ്ടിക്കു 
തോന്നുന്നുണ്ടാകും
രൂപസാദൃശ്യം.

Sunday, June 19, 2011

വെളിച്ചം

ഇരുട്ടൊരീയലിനെപ്പോലെ
പറന്നടുത്തീ-
യിത്തിരി ചിരാതില്‍
ഞാന്‍ കൊളുത്തിവെച്ച 
വെളിച്ചം കുടിച്ചു,
മരിച്ചു.

Saturday, April 23, 2011


തിടുക്കം

ഒരാകാശമുണ്ട്
മുകളില്‍   
 നിറയെ നക്ഷത്രങ്ങളും, 

കാറ്റും  കുളിരും
കൂടുകെട്ടുന്ന  
രാത്രിയുണ്ട് 
താഴെ ,

നീയുണ്ട്   
ഞാനുണ്ട് 
ഓര്‍മ്മകളുണ്ട്‌ ,


 ഇടയില്‍ 
ഒരു നുള്ള്
സ്നേഹം നനച്ച്‌
നാം ചുട്ടെടുക്കുന്ന  
ചെറിയ സ്വപ്നങ്ങളുടെ
 ചൂട് ...

സ്വല്‍പ്പം
പുളി കുറവുണ്ടെങ്കിലും 
പിണങ്ങേണ്ട.....
....പതിവിലും നന്നായി 
ഇന്ന്
നീവെച്ച
മീന്‍കറി!



Monday, February 14, 2011



ഓരോരോ തോന്നലുകള്‍

രാത്രിക്ക്
നീളം കുറഞ്ഞു 
പോയെന്നു തോന്നി,
അഴിച്ചെടുത്ത്‌ 
അലക്കി വെളുപ്പിച്ച്
പുഴക്കരയില്‍ 
ഉണക്കാനിട്ടു നോക്കുമ്പോള്‍... 
വെയിലിന്.



Followers

Blog Archive