കോടാലി 

ഒരു മരവും
ആത്മഹത്യ ചെയ്തിട്ടില്ല
ഇതേവരെ ഈ ഭൂമിയിൽ. 

പറന്നു പോകാം നമുക്കീ
പകലിന്‍റെ  കൊമ്പില്‍ നിന്നും 
ഒരു കാറ്റില്‍,
ഒരു  കിനാവിന്‍റെ
കൈകള്‍ കോര്‍ത്തലിഞ്ഞുതീരാം
പിന്നെയൊരു 
രാവിന്‍റെ കടലില്‍...

എന്റെ വാക്കുനീട്ടുമ്പോള്‍

നിന്റെ വാക്കില്‍ -

ത്തൊടുന്നത്രയും

ചെറിയതായീ  ലോകം...  

ഓര്‍മ്മകളില്‍  ഇനിയും 

മരിച്ചുതീരാത്തവര്‍ !

ഒരുപാട് വട്ടം പരാതി പറഞ്ഞവര്‍ 
പിരിഞ്ഞു പോയവര്‍,

പിന്നെയും നിലാവിന്‍റെ

നേര്‍ത്ത പുള്ളിക്കുത്തുകളില്‍

മുഖം ചേര്‍ത്ത് ഉറങ്ങാതിരുന്നവര്‍,

പറയാതെ പിന്നെ

രണ്ടു തളിരിലകള്‍ക്ക് നടുവില്‍ 

ഒരു  പൂവായി വിരിഞ്ഞവര്‍,

ഒരു കോപ്പയില്‍ രാത്രിയുടെ
ലഹരിയായ് നുരഞ്ഞവര്‍,
തെരുവിലെ തീവിളക്കുപോല്‍
ഒരു കാറ്റിലണഞ്ഞു പോയവര്‍,
നമ്മള്‍,  
ഓര്‍മ്മകളില്‍  ഇനിയും 
മരിച്ചുതീരാത്തവര്‍...